Cartografía corporal

Mira bien enantes de dir per estes agües,
hai daqué que tienes d’entender.
Equí nun hai calma,
solo una d’eses persones encegolaes cola mar
que vive despeñada y
que fai tratos col diañu.
Carne y sangre
so la bendición
de la torbonada y la rabia.
¿Nun lo ves?
Podríamos ser poesía,
—porque tu dixístime una vegada—
que poesía ye
tolo que tenga la intención
de
ser
poesía.

Podríamos percorrer les nueses llínees d’espresión,
podríamos abriganos colos deos,
podríamos vistinos con un traxe
de silenciu y sudu,
pero solo si quiesme hasta dexame ensin aire.

Nun t’esforcies en buscar corazón
onde poner la to mano,
equí los llatíos nacen nos dientes
y como surden,
esmorecen.
¿Nun lo ves?
Podríamos facer l’amor en catorce sílabes,
podríamos tarrecer tantu hasta escaecer el mesmu mieu,
zarranos na cárcel del aliendu y tragar la llave.
Podríamos metenos tou
cuanto atopemos nesta cartografía,
a ver si xúbenos
esa paz
que besa la fiebre.
Podríamos escosar los sentíos.
Podríamos cayer na tinta
y espertanos en versu.
Podríamos xugar a aldovinar
lo que tamos pensando
pero,
ensin dinos
a
  lo
    fácil.

Mira bien los mios güeyos abiertos,
que nun quiero perdeme
un solu segundu.
Equí les lluces
yá les pongo yo.
Podríamos prender la música
si te ayuda a relaxate,
y facer de l’ansiedá
una caparina qu’esnala
si lloramos mentanto.
Podríamos tarrecelo ensin mieu
hasta que nos guste
—porque tu dixístime una vegada—
que dacuando la suerte vien
al nun saber qué tas faciendo.
Podríamos arrincar les páxines convencionales
pa escribir
—cualesquier otra cosa,
cualesquier otra cosa—
con sangre d’esti bañu del
que vamos salir llimpios.

Porque tu, amor mio,
quies ser
sol de les mios nueches de seronda.
Quies faer llarga la batalla,
col corazón na ensin razón,
nin amor o dolor
que nos detengan.

Pero nun puedo
si nun me dexes
ensin vista.
Nun puedo
si nun me dexes
ensin oyíu.
Nun puedo
—non,
nun
puedo—,
si
nun
me
dexes
ensin
aire.

Mírame bien,
amor mio.
Hai daqué que tienes d’entender.
Escaezme a mi
antes d’escaecer esto.
Nun me quieras
si nun ye pa dexame
ensin aire.